ಕೃಷಿ ಚಟುವಟಿಕೆಗಳನ್ನು ಸುಲಭಗೊಳಿಸಲು ಹಾಗೂ ಕೃಷಿ ಅವಲಂಬಿತರಾಗಿ ಬದುಕು ನಡೆಸುತ್ತಿರುವ ರೈತರ ಬಾಳಿನಲ್ಲಿ ಆಶಾಕಿರಣ ಮೂಡಿಸುವಂತಹ ಕೆಲಸವನ್ನು ಇನಿಶಿಯೇಟಿವ್ಸ್‌ ಫಾರ್‌ ಡೆವಲಪ್ಮೆಂಟ್‌ ಪೌಂಢೇಷನ್‌ (ಐಡಿಎಫ್) ಸಂಸ್ಥೆ ಮಾಡುತ್ತಿದೆ. ಸುಸ್ಥಿರಕೃಷಿ ಉತ್ತೇಜಿಸುವ ನಿಟ್ಟಿನಲ್ಲಿ ತೊಡಗಿಸಿಕೊಂಡಿರುವ ಈ ಸಂಸ್ಥೆ ಸೇವಾಜಾಲ ವಿಸ್ತರಿಸುತ್ತಿದೆ.
ಐಡಿಎಫ್ ಇದು ಬರಿ ಸಂಸ್ಥೆಯಲ್ಲ; ಇದೊಂದು ಸುಸ್ಥಿರಕೃಷಿ ಅಭಿವೃದ್ಧಿ ಪಾಠಶಾಲೆ. ಅಪಾರ ಸಂಖ್ಯೆಯ ಕೃಷಿಕರಿಗೆ ಕೃಷಿ ಜ್ಯೋತಿಯಾಗಿದೆ ಎಂದರೆ ಬಹುಶಃ ಅತಿಶಯೋಕ್ತಿ ಆಗಲಾರದು. ಇದು ಸಂಸ್ಥೆಯ ಸಹಾಯ – ಸಹಕಾರ ಸಹಕಾರ ಪಡೆದ ಅನುಭವಿ ರೈತರ ಮಾತುಗಳು ಸಹ ಆಗಿದೆ.
2001 ರಲ್ಲಿ ಐಡಿಎಫ್ ಆರಂಭ. ಇದರಲ್ಲಿರುವ ಸಂಪನ್ಮೂಲ ವ್ಯಕ್ತಿಗಳೆಲ್ಲರೂ ಕೃಷಿತಜ್ಞರು, ಕೃಷಿ ಚಟುವಟಿಕೆಯಲ್ಲಿರುವ ಅನುಭವಿಗಳು. ಸಿಂಡಿಕೇಟ್‌ ಬ್ಯಾಂಕಿನ ನಿವೃತ್ತ ಅಧಿಕಾರಿಯೊಬ್ಬರು ಇದಕ್ಕೆ ಬುನಾದಿ ಹಾಕಿದರು. ೨೦೦೯ ರಲ್ಲಿ ಎನ್‌ಜಿ.ಓ. ಆಗಿ ನೋಂದಣಿ. ಗ್ರಾಮೀಣ ಭಾಗದ ಜನರು ಮತ್ತು ರೈತರ ಬದುಕನ್ನು ಸುಸ್ಥಿರಗೊಳಿಸಲು ಇದು ಸೇವೆ ಸಲ್ಲಿಸುತ್ತಿದೆ.
ತಲಾದಾಯ ಹೆಚ್ಚಳ:
ಗ್ರಾಮೀಣ ಭಾಗದಲ್ಲಿ ಕೃಷಿಯೂ ಸೇರಿದಂತೆ ಬೇರೆಬೇರೆ ವೃತ್ತಿಗಳಿವೆ. ಇವುಗಳನ್ನು ಸುಸ್ಥಿರವಾಗಿ ನಡೆಸುವುದರ ಮೂಲಕ ತಲಾದಾಯ ಹೆಚ್ಚಳಗೊಳ್ಳುವ ನಿಟ್ಟಿನಲ್ಲಿಯೂ ಸಂಸ್ಥೆ ಶ್ರಮಿಸುತ್ತಿದೆ. ಇವೆಲ್ಲವನ್ನೂ ಒಟ್ಟಂದದಲ್ಲಿ ಸುಸ್ಥಿರ ಮಾದರಿಗೆ ತರಬೇಕೆನ್ನುವುದು ಹಾಕಿಕೊಂಡಿರುವ ಗುರಿ. ಈ ನಿಟ್ಟಿನಲ್ಲಿ ಆಯ್ದ ಗ್ರಾಮೀಣ ಪ್ರದೇಶಗಳಲ್ಲಿನ ಪ್ಯಾಕೇಜ್ ಆಫ್ ಪ್ರಾಕ್ಟೀಸ್ ಮಾದರಿಗಳನ್ನು ಹೆಚ್ಚೆಚ್ಚು ವೈಜ್ಞಾನಿಕಗೊಳಿಸುವ ಕಾರ್ಯವನ್ನೂ ಮಾಡಲಾಗುತ್ತಿದೆ.
ಕ್ರಾಪಿಂಗ್ ಬೇರೆ, ಫಾರ್ಮಿಂಗ್ ಬೇರೆ. ಬೆಳೆ ಬೆಳೆಯುವುದಷ್ಟೇ ಆದರೆ ಅದು ಸೀಮಿತ ದೃಷ್ಟಿಕೋನ. ಆದರೇ ಇದನ್ನೇ ಕೃಷಿ ಎಂದು ಭಾವಿಸಬಾರದು. ಅದು ಸಮಗ್ರಕೃಷಿಯ ದೃಷ್ಟಿಕೋನ ಹೊಂದಿದಾಗ ಮಾತ್ರ ಕೃಷಿ ಎಂದು ಕರೆಸಿಕೊಳ್ಳುತ್ತದೆ. ಸ್ವಾಭಾವಿಕ ಸಂಪನ್ಮೂಲಗಳನ್ನು ಸಮರ್ಪಕವಾಗಿ ನಿರ್ವಹಣೆ ಮಾಡುವುದು, ಪೂರಕ ಉಪಕಸುಬುಗಳನ್ನು ಅವಲಂಬಿಸುವುದು ಇತ್ಯಾದಿ. ಇವೆಲ್ಲದರಿಂದಾಗಿ ಕೃಷಿಕರ ಸಂಕಷ್ಟಗಳು ಕಡಿಮೆಯಾಗುತ್ತವೆ; ಕ್ರಮೇಣ ನಿವಾರಣೆಯಾಗುತ್ತವೆ. ಮುಖ್ಯವಾಗಿ ಆದಾಯದ ಮೂಲಗಳು ಹೆಚ್ಚಳಗೊಳ್ಳುತ್ತವೆ.
ಅಪತ್ಕಾಲದಲ್ಲಿ ನೆರವು
ಸಮಗ್ರಕೃಷಿಯ ದೃಷ್ಟಿಕೋನ ಅನೇಕ ಸಂದರ್ಭಗಳಲ್ಲಿ ನೆರವಾಗುತ್ತಿರುತ್ತದೆ. ಕೃಷಿ ಸದಾ ಒಂದೇ ರೀತಿ ನಡೆಯುತ್ತದೆ ಎಂದು ಹೇಳಲಾಗುವುದಿಲ್ಲ. ಕೆಲವೊಮ್ಮೆ ಅತಿವೃಷ್ಟಿ; ಕೆಲವೊಮ್ಮೆ ಅನಾವೃಷ್ಟಿ. ಇಂಥ ಸಂದರ್ಭದಲ್ಲಿಯೂ ದೈನಂದಿನ ಜೀವನ ಏರುಪೇರಾಗದಂತೆ ನಡೆಸಿಕೊಂಡು ಹೋಗುವುದು ಸಾಧ್ಯವಾಗುತ್ತದೆ. ಆದ್ದರಿಂದ ಇಂಥ ಸಮಗ್ರಕೃಷಿ ದೃಷ್ಟಿಕೋನವನ್ನು ರೈತರು ಅಳವಡಿಸಿಕೊಳ್ಳುವಂತೆ ಮಾಡಲು ಐಡಿಎಫ್ ಶ್ರಮಿಸುತ್ತಿದೆ.
ಚಿತ್ರದುರ್ಗದ ಚಳ್ಳಕೆರೆಯಲ್ಲಿ ಐಡಿಎಫ್ ಕೆಲಸ ಮಾಡುತ್ತಿದೆ. ಇಲ್ಲಿನ ಹಲವಾರು ರೈತರ ಮನೆಗಳು, ಜಮೀನುಗಳ ಆವರಣಗಳಲ್ಲಿ ಹುಣಸೆಮರಗಳಿವೆ. ಅವೆಲ್ಲ ಮಳೆಯಾಶ್ರಿತದಲ್ಲಿ ಬೆಳೆದು ನಿಂತು ಫಸಲು ನೀಡುತ್ತಿರುವ ಮರಗಳು. ಬರಗಾಲದಲ್ಲಿಯೂ ಅವು ಫಸಲು ನೀಡುವುದನ್ನೇನೂ ನಿಲ್ಲಿಸುವುದಿಲ್ಲ. ಇಂಥ ಸಂಕಷ್ಟದ ಸಂದರ್ಭದಲ್ಲಿ ಹುಣಸೇ ಅವರಿಗೆ ಆರ್ಥಿಕ ಸಹಾಯ ಒದಗುವಂತೆ ಮಾಡುತ್ತಿವೆ. ಇದರಿಂದ ಅತಿಸಣ್ಣ ರೈತರಿಗೂ ಕನಿಷ್ಟ 45 ಸಾವಿರ ರೂ. ದೊರೆಯುತ್ತದೆ. ರೈತರಿಗೆ ಇಂಥ ಸಮಗ್ರದೃಷ್ಟಿಕೋನ ಇರಬೇಕೆಂದು ಐಡಿಫ್ ಪ್ರತಿಪಾದಿಸುತ್ತದೆ.
ಸಣ್ಣ-ಅತಿಸಣ್ಣ ರೈತರ ಸವಾಲುಗಳು:
ಐಡಿಫ್, ಸಣ್ಣ ಮತ್ತು ಅತೀ ಸಣ್ಣರೈತರ ಕೃಷಿ ಸುಸ್ಥಿರವಾಗಿರಲು ಕೆಲಸ ಮಾಡುತ್ತಿದೆ. ಈ ವಲಯದ ರೈತರು ಎದುರಿಸುತ್ತಿರುವ ಸವಾಲುಗಳು ಅನೇಕ. ಬಹಳಷ್ಟು ಸಂದರ್ಭಗಳಲ್ಲಿ ಅವರಿಗೆ ಬ್ಯಾಂಕುಗಳಿಂದ ಸಾಲ ಸಿಗುವುದಿಲ್ಲ. ಖಾಸಗಿಯವರಿಂದ ಸಾಲ ಪಡೆದರೆ ಬಡ್ಡಿ ಪ್ರಮಾಣ ಅಧಿಕ. ಇದರಿಂದ ಮತ್ತಷ್ಟೂ ಸಂಕಷ್ಟಕ್ಕೆ ಸಿಲುಕುತ್ತಾರೆ. ಇಂಥ ಸಂದರ್ಭದಲ್ಲಿ ಐಡಿಎಫ್ ಪ್ರತಿಪಾದಿಸುವ ಜೊತೆಗೆ ನೀಡುವ ಸಮಗ್ರಕೃಷಿ ದೃಷ್ಟಿಕೋನದ ಮಾದರಿಗಳು ಸಹಾಯವಾಗುತ್ತವೆ.
ಮುಖ್ಯವಾಗಿ ಕೃಷಿಯಲ್ಲಿನ ಸವಾಲು ಮತ್ತು ಸಮಸ್ಯೆಗಳನ್ನು ಎದುರಿಸಿ ಆದಾಯ ಹೆಚ್ಚಿಸಿಕೊಳ್ಳಲು ಐ.ಡಿ.ಎಫ್. ಬೆನ್ನೆಲುಬಾಗಿ ಕೆಲಸ ಮಾಡುತ್ತಿದೆ. ಸಾರ್ವಜನಿಕ ಮತ್ತು ಮಾರುಕಟ್ಟೆ ಕ್ಷೇತ್ರಗಳಲ್ಲಿ ತಾಂತ್ರಿಕ ಬಳಕೆ ಅಂಶಗಳ ಬಗ್ಗೆಯೂ ತಿಳಿಸಲಾಗುತ್ತದೆ. ಇದೂ ಸೇರಿದಂತೆ ಸಣ್ಣ ಮತ್ತು ಅತಿಸಣ್ಣ ರೈತರು ಯಾವ ರೀತಿ ತಮ್ಮ ಕೃಷಿಯಲ್ಲಿ ತೊಡಗಿಸಿಕೊಳ್ಳಬಹುದೆಂಬ ಪ್ರೇರಣೆ, ಕೌಶಲ್ಯ ಹೆಚ್ಚಿಸುವಿಕೆ, ಕಡಿಮೆ ಖರ್ಚಿನಲ್ಲಿ ಹೆಚ್ಚು ಬೆಳೆ, ಹೆಚ್ಚು ಲಾಭ ಪಡೆಯುವುದು ಹೇಗೆ ಎಂಬುದನ್ನೂ ತಿಳಿಸಲಾಗುತ್ತದೆ.
ಉದಾಹರಣೆಗೆ ಕಡಿಮೆ ಖರ್ಚಿನಲ್ಲಿ ಹೇಗೆ ಹೆಚ್ಚು ಹಾಲು ಉತ್ಪಾದನೆ ಮಾಡುವಿಕೆ; ಕಬ್ಬಿಗೆ ತಗಲುವ ಬಿಳಿಉಣ್ಣೆಯನ್ನು ಹುಳಿ ಮಜ್ಜಿಗೆ ಬಳಸಿ ನೈಸರ್ಗಿಕವಾಗಿಯೇ ಹೊಗಲಾಡಿಸುವ ವಿಧಾನ; ಈ ರೀತಿ ಹಲವಾರು ಅಂಶಗಳನ್ನು ಅವರಿಗೆ ತಿಳಿಸಿಕೊಡಲಾಗುತ್ತದೆ. ಮಣ್ಣಿನ ಫಲವತ್ತತೆ ಮತ್ತು ತೇವಾಂಶ ರಕ್ಷಣೆಯ ಬಗ್ಗೆಯೂ ಐಡಿಎಫ್ ತಿಳಿಹೇಳುತ್ತದೆ. ಈ ನಿಟ್ಟಿನಲ್ಲಿ ಮಾಹಿತಿ – ತಂತ್ರಜ್ಞಾನ; ಸಾರ್ವಜನಿಕ ವಲಯಗಳಿಂದ ಸಾಲಸೌಲಭ್ಯ ವನ್ನು ಒದಗಿಸಲಾಗುತ್ತದೆ. ಇವೆಲ್ಲದರ ಜೊತೆಗೆ ಮಾರುಕಟ್ಟೆ ವ್ಯವಸ್ಥೆಯನ್ನೂ ಕಲ್ಪಿಸಲಾಗುತ್ತಿದೆ.
ಅಧ್ಯಯನ:
ಸಣ್ಣ ಮತ್ತು ಅತಿಸಣ್ಣ ರೈತರಿಗೆ ಬೇರೆಬೇರೆ ಮಾದರಿಗಳನ್ನು ತಿಳಿಸುವ ನಿಟ್ಟಿನಲ್ಲಿ ಆಡಿಯೋ – ವಿಡಿಯೋ ಬಳಸಲಾಗುತ್ತಿದೆ. ಅಧ್ಯಯನ ಪ್ರವಾಸಗಳನ್ನು ಏರ್ಪಡಿಸಲಾಗುತ್ತಿದೆ. ಇದು ಕೇವಲ ಪ್ರವಾಸ ಅಗಿರುವುದಿಲ್ಲ. ಹೋದ ಸ್ಥಳಗಳಲ್ಲಿ ಎರಡು ದಿನ ಇದ್ದು ಅಲ್ಲಿಯ ಅಂಶಗಳನ್ನು ಕಲಿಸುವ ಕಾರ್ಯ ಮಾಡಲಾಗುತ್ತಿದೆ. ಹೀಗೆ ಆದಾಗ ಸಾಕಷ್ಟು ಪ್ರಯೋಜನಕಾರಿ ಅಂಶಗಳನ್ನು ರೈತರು ಕಲಿತು ಉತ್ಸಾಹದಿಂದ ಅಳವಡಿಸಿಕೊಳ್ಳುತ್ತಾರೆ. ಈ ದಿಶೆಯಲ್ಲಿ ಮಹಿಳಾ ಮತ್ತು ಪುರುಷರ ಪ್ರತ್ಯೇಕ ಗುಂಪುಗಳನ್ನು ಮಾಡಲಾಗುತ್ತದೆ.
ಸಾಲಸೌಲಭ್ಯ
ಆಸಕ್ತ; ಅರ್ಹರೈತರಿಗೆ ೩೦ ಸಾವಿರದಿಂದ ೭೦ ಸಾವಿರದವರೆಗೆ ಸಾರ್ವಜನಿಕ ಬ್ಯಾಂಕುಗಳಿಂದ ಸಾಲ ನೀಡಿಸಲಾಗುತ್ತದೆ.. ಎಟಿಎಂ ರೂಪೇ ಕಾರ್ಡ್‌ ಮೂಲಕ ಕೆಸಿಸಿ ಕ್ರೆಡಿಟ್‌ ಬಿಸಿನೆಸ್‌ ಫೆಸಿಲೇಟರ್ಸ್‌ ಮೂಲಕ ನೀಡಲಾಗುತ್ತದೆ.೫೫ ಸಾವಿರ ಜನರಲ್ಲಿ ೨೧ ಸಾವಿರ ಜನರು ಷೇರುದಾರರಾಗಿದ್ದಾರೆ. ರೈತರೇ ಕಂಪನಿಯಲ್ಲಿ ಷೇರುದಾರರಾಗುವಂತೆ ಮಾಡಲಾಗುತ್ತದೆ. ವ್ಯವಹಾರಕ್ಕೆ ಸಿದ್ಧಗೊಳಿಸುವುದು ಐಡಿಎಫ್ ಆದರೂ ವ್ಯವಹಾರ ಸಂಪರ್ಕವೆಲ್ಲ ರೈತರದ್ದಾಗಿರುತ್ತದೆ. ೧೪ ರೈತರು ಉತ್ಪಾದಕರ ಕಂಪೆನಿ ಇದ್ದು, ಕಂಪೆನಿ ಬೆಳೆದಂತೆ ರೈತರೇ ಷೇರುದಾರರಾಗುತ್ತಾರೆ.ಇವರಿಗೆ ಕಾರ್ಯನಿರ್ವಾಹಕ ಅಧಿಕಾರಿಗಳ ಮಾರ್ಗದರ್ಶವಿರುತ್ತದೆ.
ಜೈವಿಕ – ಸಾವಯವ ಒಳಸುರಿಗಳ ವ್ಯವಸ್ಥೆ ಒದಗಿಸುವ ಕೆಲಸವನ್ನು ಐಡಿಎಫ್ ಮಾಡುತ್ತಿದೆ. ರಾಸಾನಿಕರಹಿತ ಉತ್ಪಾದನೆಗಳಿಗೆ ಮಾತ್ರ ಆದ್ಯತೆ ನೀಡಲಾಗುತ್ತಿದೆ. ಎಫ್‌ಪಿಸಿ ಉತ್ಪಾದನೆಗಳನ್ನು ಪರೀಕ್ಷಿಸಿ ನೀಡಲಾಗುತ್ತದೆ. ನೇರವಾಗಿ ಕಂಪೆನಿ ತಯಾರಕರಿಂದ ಉತ್ಪನ್ನಗಳನ್ನು ತೆಗೆದುಕೊಂಡು ಬಂದು ರೈತರಿಗೆ ನೀಡಲಾಗುತ್ತದೆ. ಇದರಲ್ಲಿ ರೈತರ ಅನುಕೂಲವನ್ನು ಗಮನದಲ್ಲಿಟ್ಟುಕೊಂಡೇ ಉತ್ಪನ್ನ ಮಾರಾಟ ಮಾಡಲಾಗುತ್ತದೆ.
ವಿವಿಧೆಡೆ ಮಾದರಿ ಕಾರ್ಯ
ನಾಗಮಂಗಲ, ಕುಣಿಗಲ್, ಗುಬ್ಬಿ, ತುಮಕೂರು, ಹಾವೇರಿ, ರಾಣೇಬೆನ್ನೂರು, ಬ್ಯಾಡಗಿ ಮತ್ತು ಧಾರವಾಡ ತಾಲ್ಲೂಕುಗಳಲ್ಲಿ ಐಡಿಎಫ್ ಕೆಲಸ ಮಾಡುತ್ತಿದೆ. ಇಲ್ಲೆಲ್ಲ ರೈತರ ಗುಂಪು/ಕಂಪನಿ ಉತ್ಪಾದಿಸಿದ ಉತ್ಪನ್ನಗಳನ್ನು ಅವರೇ ನೇರವಾಗಿ ಮಾರಾಟ ಮಾಡುವ ವ್ಯವಸ್ಥೆ ಮಾಡಲಾಗುತ್ತದೆ. ಇದರ ಮೂಲಕ ಮಾರಾಟದಿಂದ ಬರುವ ಗರಿಷ್ಠ ಲಾಭ ನೇರ ರೈತರಿಗೆ ತಲುಪುವಂತೆ ವ್ಯವಸ್ಥೆ ಮಾಡಲಾಗಿದೆ.
ಹೆಚ್ಚಿನ ಮಾಹಿತಿಗೆ ಸಂಪರ್ಕಿಸಿ: ಐಡಿಎಫ್ ಕಚೇರಿ, ದೂರವಾಣಿ: 080 – 2656 8892
