2023ನೇ ವರ್ಷದ ಆಗಸ್ಟ್ ಅವಧಿಯಲ್ಲಿ, ಉತ್ತರಾಖಂಡದ ಋಷಿಕೇಶವು ದೇಶದ ಅತ್ಯಂತ ತೇವಭರಿತ ಪಟ್ಟಣ ಎಂಬ ದಾಖಲೆಯನ್ನು ಪಡೆದುಕೊಂಡಿದೆ. ದಕ್ಷಿಣ ಕೊರಿಯಾದ ಜೆಜು ರಾಷ್ಟ್ರೀಯ ವಿಶ್ವವಿದ್ಯಾಲಯದ ಟೈಫೂನ್ ಸಂಶೋಧನಾ ಕೇಂದ್ರದ ಸಂಶೋಧನಾ ವಿಜ್ಞಾನಿ ವಿನೀತ್ ಕುಮಾರ್ ಸಿಂಗ್ ಪ್ರಕಾರ, ಆಗಸ್ಟ್ 1 ಮತ್ತು ಆಗಸ್ಟ್ 25 ರ ನಡುವೆ ಈ ಸ್ಥಳದಲ್ಲಿ 1,901 ಮಿಲಿಮೀಟರ್ ದಾಖಲೆ ಮಳೆಯಾಗಿದೆ.
ಅದೇ ಅವಧಿಯಲ್ಲಿ, ಭಾರತ ಮತ್ತು ವಿಶ್ವದ ಎರಡು ತೇವಭರಿತ ಸ್ಥಳಗಳಾದ ಚಿರಾಪುಂಜಿ ಮತ್ತು ಮೌಸಿನ್ರಾಮ್ ಕ್ರಮವಾಗಿ 1,876.3 ಮಿಮೀ ಮತ್ತು 1,464 ಮಿಮೀ ಮಳೆಯನ್ನು ಪಡೆದಿವೆ. ಆಗಸ್ಟ್ ಕೊನೆಯ ವಾರದ ಮೂರು ದಿನಗಳಲ್ಲಿ, ಚಿರಾಪುಂಜಿ 332 ಮಿಮೀ ಮಳೆಯೊಂದಿಗೆ ಮೊದಲ ಸ್ಥಾನವನ್ನು ಪಡೆದುಕೊಂಡಿದೆ ಎಂದು ಸಿಂಗ್ ಹೇಳಿದರು.
ಭಾರಿ ಮಳೆಯಿಂದಾಗಿ ಋಷಿಕೇಶದಲ್ಲಿ ಗಮನಾರ್ಹ ಪ್ರವಾಹ ಉಂಟಾಗಿದೆ . ಗಂಗಾ ನದಿಯು ಆಗಸ್ಟ್‌ನಲ್ಲಿ ಹಲವು ದಿನಗಳವರೆಗೆ ತನ್ನ ಅಪಾಯದ ಮಟ್ಟಕ್ಕಿಂತ ಹೆಚ್ಚಾಗಿ ಹರಿದಿದೆ. ಇದು ಪರ್ವತದ ಪಟ್ಟಣವಾದ ನಿವಾಸಿಗಳು ತಲ್ಲಣಗೊಳ್ಳುವಂತೆ ಮಾಡಿದೆ. ನಿರಂತರ ಭಾರಿಮಳೆ ಕಾರಣ ಸಾವುನೋವು ಸಹ ಸಂಭವಿಸಿದೆ.
ಋಷಿಕೇಶವನ್ನು ಹೊರತುಪಡಿಸಿ, ಪ್ರಸ್ತುತ ನೈಋತ್ಯ ಮುಂಗಾರು ಋತುವಿನಲ್ಲಿ ಉಳಿದ ಪರ್ವತ ರಾಜ್ಯಗಳಾದ ಉತ್ತರಾಖಂಡ ಮತ್ತು ಹಿಮಾಚಲ ಪ್ರದೇಶಗಳಲ್ಲಿಯೂ ಅನಾಹುತಕಾರಿ ಪ್ರಮಾಣದ ಮಳೆಯಾಗಿದೆ. ಜುಲೈ ಮೊದಲ ಎರಡು ವಾರಗಳಲ್ಲಿ, ಪಶ್ಚಿಮದ ಅಡಚಣೆ ಮತ್ತು ಮಾನ್ಸೂನ್ ಕಡಿಮೆ-ಒತ್ತಡದ ಪ್ರದೇಶದ ನಡುವಿನ ಅಪರೂಪದ ಪರಸ್ಪರ ಕ್ರಿಯೆಯಿಂದಾಗಿ ಈ ಎರಡು ರಾಜ್ಯಗಳಲ್ಲಿ ಅತೀ ಭಾರೀ ಮಳೆಯಾಗಿದೆ.
ದೇಶದ ಬಹುತೇಕ ಕಡೆಗಳಲ್ಲಿ ಆಗಸ್ಟ್ ನಲ್ಲಿ ಮುಂಗಾರು ವಿರಾಮದ ಹಂತದಲ್ಲಿದ್ದರೆ ಈ ಪ್ರದೇಶಗಳಲ್ಲಿ ಅತೀ ಹೆಚ್ಚಿನ ಮಳೆಯಾಯಿತು. ದೇಶದಾದ್ಯಂತ ಹೆಚ್ಚಿನ ಮಳೆಯನ್ನು ಉಂಟುಮಾಡುವ ಕಡಿಮೆ ಒತ್ತಡದ ವಿಸ್ತೃತ ಪ್ರದೇಶವಾದ ಮುಂಗಾರು ತೊಟ್ಟಿಯು ವಾಯುವ್ಯ ಮತ್ತು ಮಧ್ಯ ಭಾರತದ ಕೆಲವು ಭಾಗಗಳಲ್ಲಿ ತನ್ನ ಸಾಮಾನ್ಯ ಸ್ಥಾನದಿಂದ ಉತ್ತರಕ್ಕೆ ಚಲಿಸಿದಾಗ ಮಾನ್ಸೂನ್ ವಿರಾಮದ ಹಂತದಲ್ಲಿದೆ ಎಂದು ಹೇಳಲಾಗುತ್ತದೆ. .
ವಿರಾಮದ ಹಂತದಲ್ಲಿ, ಮಳೆಯ ಮಾದರಿಯು ಹಿಮಾಲಯದ ತಪ್ಪಲಿನ ಕಡೆಗೆ ಬದಲಾಗುತ್ತದೆ, ಅಲ್ಲಿ ಭಾರೀ ಮಳೆಯಾಗುತ್ತದೆ, ಆಗಾಗ್ಗೆ ಮೇಘಸ್ಫೋಟದ ಘಟನೆಗಳು ನಡೆಯುತ್ತವೆ. ಇದೇ ಅವಧಿಯಲ್ಲಿ ದೇಶದ ಉಳಿದ ಭಾಗವು ಗಮಾನರ್ಹ ಮಳೆ ಪ್ರಮಾಣ ಪಡೆಯುವುದಿಲ್ಲ.
ನೈರುತ್ಯ ಮುಂಗಾರು ಆಗಸ್ಟ್ 7-18 ಮತ್ತು ನಂತರ ಮತ್ತೆ ಆಗಸ್ಟ್ 24 ರಿಂದ ವಿರಾಮದ ಹಂತದಲ್ಲಿತ್ತು. ತಿಂಗಳ ವಿರಾಮದ ಮಾನ್ಸೂನ್ ಹಂತಗಳ ಕಾರಣದಿಂದಾಗಿ ಒಟ್ಟಾರೆಯಾಗಿ ದೇಶದ ಹಲವೆಡೆ ಶುಷ್ಕ ವಾತಾವರಣವಿದೆ.
ಎರಡು ತಿಂಗಳುಗಳಿಂದ ಸುರಿಯುತ್ತಿರುವ ಧಾರಾಕಾರ ಮಳೆಯು ಉತ್ತರಾಖಂಡ ಮತ್ತು ಹಿಮಾಚಲ ಪ್ರದೇಶದಲ್ಲಿ ಅನೇಕ ಹಠಾತ್ ಪ್ರವಾಹ ಮತ್ತು ಭೂಕುಸಿತಗಳಿಗೆ ಕಾರಣವಾಗಿದೆ. ಇದರ ಪರಿಣಾಮವಾಗಿ ಜೀವಹಾನಿ ಜೊತೆಗೆ ಮೂಲಸೌಕರ್ಯಗಳು ಬೃಹತ್ ಪ್ರಮಾಣದಲ್ಲಿ ನಾಶವಾಗಿದೆ.
ಏಪ್ರಿಲ್ 1 ರಿಂದ ಆಗಸ್ಟ್ 27 ರ ಅವಧಿಯಲ್ಲಿ ಹಿಮಾಚಲ ಪ್ರದೇಶದಲ್ಲಿ ಪ್ರವಾಹ ಮತ್ತು ಭೂಕುಸಿತದಿಂದ 192 ಸಾವುಗಳು ಸಂಭವಿಸಿವೆ, ಆದರೆ ಉತ್ತರಾಖಂಡದಲ್ಲಿ ಈ ಸಂಖ್ಯೆ 81 ಆಗಿದೆ ಎಂದು ಕೇಂದ್ರ ಗೃಹ ಸಚಿವಾಲಯದ ವಿಪತ್ತು ನಿರ್ವಹಣಾ ವಿಭಾಗದ ಅಂಕಿಅಂಶಗಳು ತಿಳಿಸಿವೆ.
