ನಮ್ಮ ಮತ್ತು ನಮ್ಮ ಕುಟುಂಬದ ಸದಸ್ಯರ ಆರೋಗ್ಯ ತುಸು ಏರುಪೇರಾದರೂ ವೈದ್ಯರ ಬಳಿ ಧಾವಿಸುತ್ತೇವೆ. ಅವರು ಹೇಳುವ ಎಲ್ಲ ಪರೀಕ್ಷೆಗಳನ್ನು ಮಾಡಿಸುತ್ತೇವೆ. ಅವರು ಬರೆದುಕೊಟ್ಟ ಔಷಧ ಸೇವಿಸುತ್ತೇವೆ. ಆದರೆ ಒಂದು ಅಂಶ ಮಾತ್ರ ಮರೆಯುತ್ತೇವೆ. ಅದೇನೆಂದರೆ ನಾವು ಸೇವಿಸುತ್ತಿರುವ ಆಹಾರದ ಮೂಲವಾದ ಮಣ್ಣಿನ ಆರೋಗ್ಯ ಎಷ್ಟರ ಮಟ್ಟಿಗಿದೆ ಎಂಬುದನ್ನು ಕಡೆಗಾಣಿಸುತ್ತೇವೆ. ಇದೇ ಹೆಚ್ಚಿನ ಸಮಸ್ಯೆಗೆ ಕಾರಣಗಿದೆ.
ನಮ್ಮ ತಟ್ಟೆಗಳಲ್ಲಿರುವ ಆಹಾರ , ನಾವು ಕುಡಿಯುವ ನೀರು, ನಾವು ಉಸಿರಾಡುವ ಗಾಳಿ ಎಲ್ಲವುಗಳನ್ನು ಮಣ್ಣಿನ ಗುಣಮಟ್ಟವು ಪ್ರಭಾವಿಸುತ್ತದೆ. ಇದು ನಮಗೆ ಗೊತ್ತಿದ್ದ ಅಂಶವೇ ಆದರೂ ಇತ್ತೀಚಿನ ಅಧ್ಯಯನಗಳು ಮತ್ತೆ ಪುಷ್ಟೀಕರಿಸುತ್ತಿವೆ.
ಆರೋಗ್ಯಕರ ಮಣ್ಣು, ಸಾವಯವ ಪದಾರ್ಥಗಳು ಮತ್ತು ಪ್ರಯೋಜನಕಾರಿ ಸೂಕ್ಷ್ಮಜೀವಿಗಳಿಂದ ಸಮೃದ್ಧವಾಗಿರುತ್ತದೆ. ಉತ್ತಮ ಪೋಷಕಾಂಶಗಳ ಚಕ್ರ, ಮಣ್ಣಿಗಿರುವ ನೀರಿನ ಧಾರಣಾ ಶಕ್ತಿ, ಆಯಾ ಪರಿಸರದಲ್ಲಿರುವ ಕೀಟಗಳು ಮತ್ತು ಹೆಚ್ಚಿನ ಗುಣಮಟ್ಟದ ಮಟ್ಟದ ಜೀವಸತ್ವಗಳು, ಖನಿಜಗಳು ಮತ್ತು ಉತ್ಕರ್ಷಣ ನಿರೋಧಕ ಅಂಶಗಳಿರುವ ಕೃಷಿ ಉತ್ಪನ್ನಗಳಿಗೂ ಪೂರಕ ಸಂಬಂಧವಿದೆ.
ಹೆಚ್ಚು ಪೋಷಕಾಂಶಗಳನ್ನು ಹೊಂದಿರುವ ಮಣ್ಣು, ಸಸ್ಯದ ಆರೋಗ್ಯವನ್ನು ಉತ್ತೇಜಿಸುವ ಸಾರಜನಕ ಮತ್ತು ಮಾನವ ಆರೋಗ್ಯಕ್ಕೆ ಪ್ರಯೋಜನಕಾರಿಯಾದ ಸೆಲೆನಿಯಮ್ ಇವುಗಳ ಸಂಯೋಜನೆ ಹೆಚ್ಚು ಪೌಷ್ಟಿಕ ಆಹಾರವನ್ನು ನೀಡುತ್ತದೆ. ಕಬ್ಬಿಣ, ಸತು ಮತ್ತು ಅಯೋಡಿನ್‌ನಂತಹ ಮಣ್ಣಿನಲ್ಲಿರುವ ಮೂಲಭೂತ ಸೂಕ್ಷ್ಮ ಪೋಷಕಾಂಶಗಳು ನಮ್ಮ ಆರೋಗ್ಯದ ಮೇಲೆ ನೇರವಾಗಿ ಪರಿಣಾಮ ಬೀರುತ್ತವೆ ಎಂದು ವಿಜ್ಞಾನಿ ಸೆಹ್ಲ್ಕೆ ಹೇಳುತ್ತಾರೆ.
ಇದಲ್ಲದೆ ಮಣ್ಣಿನಲ್ಲಿರುವ ಖನಿಜಗಳು ಮತ್ತು ಸೂಕ್ಷ್ಮಜೀವಿಗಳು ಮಣ್ಣಿನ ಪದರಗಳ ಮೂಲಕ ಚಲಿಸುವಾಗ ಗಾಳಿ ಮತ್ತು ನೀರಿನಿಂದ ಭಾರವಾದ ಲೋಹಗಳು, ಸಾವಯವ ತ್ಯಾಜ್ಯ ಮತ್ತು ಹಾನಿಕಾರಕ ಬ್ಯಾಕ್ಟೀರಿಯಾ ಮತ್ತು ವೈರಸ್‌ಗಳಂತಹ ಮಾಲಿನ್ಯಕಾರಕಗಳನ್ನು ಫಿಲ್ಟರ್ ಮಾಡಲು ಸಹಾಯ ಮಾಡುತ್ತವೆ. ಇದಕ್ಕೆ ವಿರುದ್ಧವಾಗಿ ಪೋಷಕಾಂಶ ರಹಿತವಾದ ಖಾಲಿ ಮಣ್ಣು, ಪರಿಸರ ಮತ್ತು ನಮ್ಮ ಆರೋಗ್ಯ ಎರಡಕ್ಕೂ ಅಪಾಯವನ್ನುಂಟುಮಾಡುತ್ತದೆ.
ಮಣ್ಣಿನಲ್ಲಿ ‘ಡಿಸ್ಬಯೋಸಿಸ್’ ಅಥವಾ ಅದರಲ್ಲಿರುವ ಜೀವಿಗಳ ಅಸಮತೋಲ ಉಂಟಾದಾಗ ಅಂಥ ಮಣ್ಣಿನಲ್ಲಿ ಬೆಳೆಯುವ ಸಸ್ಯವು ಒತ್ತಡವನ್ನು ಗ್ರಹಿಸುತ್ತದೆ. ಈ ಒತ್ತಡವು ಸಸ್ಯದ ಒಟ್ಟಾರೆ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ಇದರ ಪರಿಣಾಮವಾಗಿ, ಅದರಿಂದ ತಯಾರಿಸಿದ ಆಹಾರವು ತೀರಾ ಕಡಿಮೆ ಪೌಷ್ಟಿಕಾಂಶ ಹೊಂದಿರುತ್ತದೆ
1950 ರಿಂದ 1999 ನಂತರ ಇದುವರೆಗಿನ ಹಣ್ಣುಗಳು ಮತ್ತು ತರಕಾರಿಗಳಲ್ಲಿರುವ ಪೌಷ್ಟಿಕಾಂಶಗಳ ಬಗ್ಗೆ ಆಳವಾದ ಅಧ್ಯಯನ ನಡೆದಿದೆ. ಈ ಅಂಕಿಅಂಶದ ವಿಶ್ಲೇಷಣೆ, ಜರ್ನಲ್ ಆಫ್ ಅಮೇರಿಕನ್ ಕಾಲೇಜ್ ಆಫ್ ನ್ಯೂಟ್ರಿಷನ್‌ನಲ್ಲಿ ಪ್ರಕಟವಾಗಿದೆ. ಇದರ ಪ್ರಕಾರ ಪ್ರೋಟೀನ್, ವಿಟಮಿನ್ ಬಿ 2 ಮತ್ತು ಸಿ, ಕಬ್ಬಿಣ, ಕ್ಯಾಲ್ಸಿಯಂ ಮತ್ತು ರಂಜಕದಲ್ಲಿ ಗಮನಾರ್ಹ ಕುಸಿತವಾಗುತ್ತಿರುವುದು ಕಂಡು ಬಂದಿದೆ.
ತೀರಾ ಇತ್ತೀಚೆಗೆ, ಫುಡ್ ಜರ್ನಲ್‌ನಲ್ಲಿ ಪ್ರಕಟವಾದ 2024 ರ ವಿಮರ್ಶೆಯು ಸೇಬುಗಳು, ಕಿತ್ತಳೆಗಳು, ಬಾಳೆಹಣ್ಣುಗಳು ಸೇರಿದಂತೆ ಹಲವಾರು ಹಣ್ಣುಗಳು, ಟೊಮೆಟೊಗಳು ಮತ್ತು ಆಲೂಗಡ್ಡೆಗಳಂತಹ ತರಕಾರಿಗಳು ಕಳೆದ 50 ರಿಂದ 70 ವರ್ಷಗಳಲ್ಲಿಶೇಕಡ 25 ರಿಂದ 50 ಅಥವಾ ಅದಕ್ಕಿಂತ ಹೆಚ್ಚಿನ ಪೌಷ್ಟಿಕಾಂಶದ ಸಾಂದ್ರತೆಯನ್ನು ಕಳೆದುಕೊಂಡಿವೆ ಎಂದು ಹೇಳುತ್ತದೆ. ಇದು ಪ್ರಾಥಮಿಕವಾಗಿ ಮಣ್ಣಿನ ಅವನತಿ, ಆಕ್ರಮಣಕಾರಿ ಅಂದರೆ ರಾಸಾಯನಿಕ ಕೃಷಿ ಪದ್ಧತಿಗಳಿಂದ ಉಂಟಾಗಿದೆ.
ಇವುಗಳಿಂದ ಕಡಿಮೆ ಪೌಷ್ಟಿಕಾಂಶದ ಆಹಾರ ಉತ್ಪಾದನೆಯಾಗುತ್ತದೆ. ಜೊತೆಗೆ ಕಡಿಮೆ ಗುಣಮಟ್ಟದ ಮಣ್ಣು, ವಿಷಕಾರಿ ರಾಸಾಯನಿಕಗಳು ಮತ್ತು ರೋಗ ಉಂಟುಮಾಡುವ ಸೂಕ್ಷ್ಮಜೀವಿಗಳಿಗೆ ನಮ್ಮನ್ನು ಒಡ್ಡುತ್ತದೆ . ಕಳಪೆ ಗಾಳಿ ಮತ್ತು ನೀರಿನ ಗುಣಮಟ್ಟಕ್ಕೆ ಕೊಡುಗೆ ನೀಡುತ್ತದೆ ಎಂದು ಸೆಹ್ಲ್ಕೆ ಹೇಳುತ್ತಾರೆ.
ಮಣ್ಣು-ಕರುಳಿನ ಸಂಪರ್ಕ
ಮಣ್ಣು ಕೊಳಕಲ್ಲ. ಆದ್ದರಿಂದಲೇ ಕೃಷಿಕರು ಬೇಸಾಯದ ಸಲುವಾಗಿ ಕೃಷಿಭೂಮಿಗೆ ಕಾಲಿಟ್ಟಾಗ ಬೊಗಸೆಯಲ್ಲಿ ಅಲ್ಲಿನ ಮಣ್ಣನ್ನು ತುಂಬಿಕೊಂಡು ನಮಸ್ಕರಿಸುತ್ತಿದ್ದರು. ಮಣ್ಣು, ಬ್ಯಾಕ್ಟೀರಿಯಾ, ಶಿಲೀಂಧ್ರಗಳು ಮತ್ತು ಪ್ರೊಟೊಜೋವಾದಂತಹ ಶತಕೋಟಿ ಸೂಕ್ಷ್ಮಜೀವಿಗಳಿಂದ ತುಂಬಿರುವ ಜೀವಂತ ಪರಿಸರ ವ್ಯವಸ್ಥೆಯಾಗಿದೆ.
ವಾಸ್ತವವಾಗಿ, ಮಣ್ಣಿನ ಸೂಕ್ಷ್ಮಜೀವಿಯು ನಮ್ಮ ಕರುಳಿನ ಬಳ್ಳಿಯನ್ನು ಹೋಲುತ್ತದೆ. ಈ ಎರಡೂ ಪರಿಸರ ವ್ಯವಸ್ಥೆಗಳು ರೋಗಕಾರಕಗಳನ್ನು ಹಿಮ್ಮೆಟ್ಟಿಸುತ್ತವೆ. ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸುತ್ತವೆ. ಅಪಾರ ಸಂಖ್ಯೆಯ ಸಕ್ರಿಯ ಸೂಕ್ಷ್ಮಾಣುಜೀವಿಗಳನ್ನು ಮಣ್ಣು ಹೊಂದಿದೆ. ಆದರೆ ಮಣ್ಣಿನಲ್ಲಿ ಕಂಡು ಬರುವ ಜೀವವೈವಿಧ‍್ಯತೆಯ ಶೇಕಡ 10 ರಷ್ಟು ಜೀವವೈವಿಧ್ಯತೆ ಮನುಷ್ಯರ ಕರುಳಿನಲ್ಲಿದೆ.
ಮಣ್ಣಿನ ಸೂಕ್ಷ್ಮಜೀವಿಗಳ ಪರಿಸರ ವ್ಯವಸ್ಥೆಯು ನಮ್ಮ ಕರುಳಿನ ಸೂಕ್ಷ್ಮಜೀವಿಗಳ ಮೇಲೆ ಗಣನೀಯವಾಗಿ ಪ್ರಭಾವ ಬೀರುತ್ತದೆ. ಉದಾಹರಣೆಗೆ, ಮಣ್ಣಿನೊಂದಿಗೆ ಒಡನಾಟ ಇಲ್ಲದಿರುವುದು, ಮಣ್ಣಿನ ಜೀವವೈವಿಧ್ಯತೆ ಗಣನೀಯವಾಗಿ ಕಡಿಮೆಯಾಗಿರುವುದು ಮತ್ತು ಇತರ ಜೀವನಶೈಲಿಯ ಅಂಶಗಳು ಮನುಷ್ಯರಲ್ಲಿ ಪ್ರಯೋಜನಕಾರಿ ಕರುಳಿನ ಸೂಕ್ಷ್ಮಜೀವಿಗಳ ನಷ್ಟಕ್ಕೆ ಕಾರಣವಾಗಿವೆ ಎಂದು ಅಧ್ಯಯನವು ಹೇಳುತ್ತದೆ.
ಮಣ್ಣು ಮತ್ತು ನಮ್ಮ ಕರುಳು ಎರಡರಲ್ಲೂ ಈ ಜೀವವೈವಿಧ್ಯದ ನಷ್ಟವು ಕರುಳಿನ ಬ್ಯಾಕ್ಟೀರಿಯಾದ ಅಸಮತೋಲನದಿಂದ ಉಂಟಾಗುವ ಜೀವನಶೈಲಿ ರೋಗಗಳ ಹೆಚ್ಚಳಕ್ಕೆ ಸಂಬಂಧಿಸಿದೆ. ಉದಾಹರಣೆಗೆ, ಮಧುಮೇಹ, ಬೊಜ್ಜು, ಉರಿಯೂತದ ಕರುಳಿನ ಕಾಯಿಲೆ, ಇತ್ಯಾದಿ
ದೇಹವು ಅಗತ್ಯವಿರುವ ಪೋಷಕಾಂಶಗಳನ್ನು ಪಡೆಯದಿದ್ದಾಗ, ಹೆಚ್ಚಿನ ಪೋಷಕಾಂಶಗಳನ್ನು ಪಡೆಯಲು ಹೆಚ್ಚಿನ ಹಸಿವನ್ನು ಪ್ರಚೋದಿಸುತ್ತದೆ. ಸಮಸ್ಯೆಯೆಂದರೆ ಹೆಚ್ಚಿನ ಜನರು ಈ ‘ಗುಪ್ತ ಹಸಿವು’ ತಣಿಸಲು ಅಥವಾ ಶಮನ ಮಾಡಲು ಸಂಸ್ಕರಿಸಿದ ಆಹಾರಗಳನ್ನು ಸೇವಿಸುತ್ತಾರೆ ಎಂದು ವಿಜ್ಞಾನಿಗಳು ವಿಷಾದ ವ್ಯಕ್ತಪಡಿಸುತ್ತಾರೆ.
ಕರುಳಿನ ಸೂಕ್ಷ್ಮಾಣುಜೀವಿಗಳು ಹಸಿವನ್ನು ನಿಯಂತ್ರಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತವೆ. ನಮ್ಮ ಕರುಳಿನ ಸೂಕ್ಷ್ಮಾಣುಜೀವಿಗಳಲ್ಲಿನ ಜೈವಿಕ ವೈವಿಧ್ಯತೆಯು ಈ ನೈಸರ್ಗಿಕ ನಿಯಂತ್ರಣದ ಮೇಲೆ ಪ್ರಭಾವ ಬೀರುತ್ತದೆ. ಪೋಷಕಾಂಶಗಳ ಕೊರತೆಯು ಕರುಳಿನ ಆರೋಗ್ಯವನ್ನು ಬಾಧಿಸುಸುತ್ತದೆ.
ಮಣ್ಣಿನೊಂದಿಗೆ ಒಡನಾಟವಿರಿಸಿಕೊಳ್ಳಿ
ಆರೋಗ್ಯಕರ ಮಣ್ಣಿನ ಒಡನಾಟದ ಮೂಲಕ ನಮ್ಮ ಆರೋಗ್ಯವನ್ನು ಸದಾ ಕಾಪಾಡಿಕೊಳ್ಳಲು, ಪುನಶ್ಚೇತನಗೊಳಿಸಿಕೊಳ್ಳಲು ಸಾಧ್ಯ
1) ಪುನರುತ್ಪಾದಕ ಕೃಷಿಗೆ ಬೆಂಬಲ
ರಾಸಾಯನಿಕ ಹಾಗೂ ಆಧುನಿಕ ಕೃಷಿ ಪದ್ಧತಿಗಳು ಆಳವಾದ ಉಳುಮೆ, ಕಳೆನಾಶಕ ವ್ಯವಸ್ಥೆ ಹೊಂದಿರುತ್ತವೆ. ಜೊತೆಗೆ ಕಠಿಣ ರಾಸಾಯನಿಕಗಳು ಮತ್ತು ಹೆಚ್ಚಿನ ಸಾರಜನಕ ಮಟ್ಟವನ್ನು ಹೊಂದಿರುವ ರಸಗೊಬ್ಬರಗಳನ್ನು ಒಳಗೊಂಡಿರುತ್ತವೆ. “ಇವೆಲ್ಲವೂ ಮಣ್ಣಿನ ಸೂಕ್ಷ್ಮಜೀವಿಗಳ ಮೇಲೆ ದುಷ್ಪರಿಣಾಮ ಬೀರುತ್ತವೆ. ಅವುಗಳ ಆರೋಗ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತವೆ
ಮತ್ತೊಂದೆಡೆ, ಪುನರುತ್ಪಾದಕ ಕೃಷಿಯು ಮಣ್ಣಿನ ಸಾವಯವ ಪದಾರ್ಥವನ್ನು ಪುನರ್ನಿರ್ಮಿಸಲು ಮತ್ತು ಮಣ್ಣಿನ ಜೀವವೈವಿಧ್ಯತೆಯನ್ನು ಮರುಸ್ಥಾಪಿಸಲು ಪೂರಕವಾಗಿರುತ್ತದೆ.
ಕಡಿಮೆ ಅಥವಾ ಬೇಸಾಯ ಮಾಡದಿರುವುದು, ಬೆಳೆ ಸರದಿ, ಮಿಶ್ರಗೊಬ್ಬರ ಮತ್ತು ಹೊಂದಾಣಿಕೆ ಸಸ್ಯಗಳ ಕೃಷಿ ಮಾಡುವುದು ಅಗತ್ಯ
ಆಹಾರ, ಬಟ್ಟೆ, ಹೂವುಗಳು, ಕೂದಲಿನ ಆರೈಕೆ ಅಥವಾ ತ್ವಚೆಗಾಗಿ ಪುನರುತ್ಪಾದಕ ಸಾವಯವ-ಪ್ರಮಾಣೀಕೃತ ಉತ್ಪನ್ನಗಳನ್ನು ಬಳಸುವುದು ಅಗತ್ಯ
2) ಕೈ ಕೆಸರಾಗಲಿ
ಮನೆಯಲ್ಲಿ ತಾಜಾ, ಪೌಷ್ಟಿಕಾಂಶ ಹೊಂದಿರುವ ಹಣ್ಣು – ತರಕಾರಿಗಳನ್ನು ಸೇವಿಸಲು ಸ್ವತಃ ಅವುಗಳನ್ನು ಬೆಳೆಯಲು ಪ್ರಯತ್ನಿಸಿ. ಸ್ವಂತ ಜಮೀನು ಇಲ್ಲದಿದ್ದರೆ ಕುಂಡಗಳಲ್ಲಿ ಅಂದರೆ ಫಾಟ್ ಗಳಲ್ಲಿ ಬೆಳೆಸಲು ಸಾಧ್ಯವಾಗುವ ಹಣ್ಣು, ತರಕಾರಿ ಬೆಳೆಯಿರಿ. ಮಣ್ಣಿನ ಸೂಕ್ಷ್ಮಜೀವಿಗಳಿಗೆ ಒಡ್ಡಿಕೊಳ್ಳುವುದರಿಂದ ತೋಟಗಾರರಲ್ಲದವರಿಗೆ ಹೋಲಿಸಿದರೆ ತೋಟಗಾರಿಕೆ ಮಾಡುವವರು ತಮ್ಮ ಕರುಳಿನಲ್ಲಿ ಉತ್ತಮ ಬ್ಯಾಕ್ಟೀರಿಯಾವನ್ನು ಹೊಂದಿರುತ್ತಾರೆ ಎಂದು ಸಂಶೋಧನೆ ಸೂಚಿಸುತ್ತದೆ.
3) ಕಾಂಪೋಸ್ಟ್ ಮಾಡಲು ಪ್ರಯತ್ನಿಸಿ
ಮಿಶ್ರಗೊಬ್ಬರವು ರಾಸಾಯನಿಕ ತ್ಯಾಜ್ಯವನ್ನು ಕಡಿಮೆ ಮಾಡುತ್ತದೆ ಆದರೆ ಮಣ್ಣಿನ ಪೋಷಕಾಂಶಗಳನ್ನು ಪುನಃಸ್ಥಾಪಿಸಲು ಸಹಾಯ ಮಾಡುತ್ತದೆ ಮತ್ತು ಮಣ್ಣಿನ ಜೀವವೈವಿಧ್ಯವನ್ನು ಹೆಚ್ಚಿಸುತ್ತದೆ. ಇದರರ್ಥ ಉತ್ತಮ ಪೌಷ್ಟಿಕಾಂಶದ ಲಭ್ಯತೆ
4) ಮಣ್ಣಿನ ಪರಿಸರ ವ್ಯವಸ್ಥೆ
ರಾಸಾಯನಿಕ ಕೀಟನಾಶಕಗಳು ಮತ್ತು ಸಸ್ಯನಾಶಕಗಳ ಅತಿಯಾದ ಬಳಕೆ ಮಣ್ಣಿನ ಪರಿಸರ ವ್ಯವಸ್ಥೆಯನ್ನು ಅಡ್ಡಿಪಡಿಸುತ್ತದೆ. ಈ ವಿಷಕಾರಿ ರಾಸಾಯನಿಕಗಳು ಮಣ್ಣಿನ ಮೂಲಕ ಸೋರಿಕೆಯಾಗುತ್ತವೆ. ಅಂತರ್ಜಲವನ್ನು ಕಲುಷಿತಗೊಳಿಸುತ್ತವೆ.
ಹಾನಿಕಾರಕ ಪರಿಣಾಮಗಳನ್ನು ಕಡಿಮೆ ಮಾಡಲು, ನಿಮ್ಮ ಮನೆ ಅಂಗಳದ ಕುಂಡಗಳಲ್ಲಿರುವ ಸಸ್ಯಗಳು ಅಥವಾ ಉದ್ಯಾನಕ್ಕಾಗಿ ಪೈರೆಥ್ರಮ್ ಅಥವಾ ಇಪಿಎ-ನೋಂದಾಯಿತ ಸಸ್ಯ ಮೂಲದ ಜೈವಿಕ ಕೀಟನಾಶಕಗಳನ್ನು ಆಯ್ಕೆಮಾಡಿ. ಅಗತ್ಯವಿದ್ದಾಗ ಮಾತ್ರ ಅವುಗಳನ್ನು ಬಳಸಿ
5) ಹೆಚ್ಚು ಸಾವಯವ ಆಹಾರವನ್ನು ಸೇವಿಸಿ
ಸಾವಯವ ಆಹಾರಗಳನ್ನು ಮತ್ತು ಕನಿಷ್ಠ ಸಂಸ್ಕರಿಸಿದ ಆಹಾರ ಸೇವನೆ ಅಗತ್ಯ ದುರದೃಷ್ಟವಶಾತ್, ಆಹಾರ ಸಂಸ್ಕರಣೆಯು ತರಕಾರಿಗಳು ಮತ್ತು ಹಣ್ಣುಗಳಲ್ಲಿನ ಹೆಚ್ಚಿನ ಫೈಟೊನ್ಯೂಟ್ರಿಯಂಟ್ಗಳನ್ನು ತೆಗೆದುಹಾಕುತ್ತದೆ.
ಫೈಟೊನ್ಯೂಟ್ರಿಯೆಂಟ್‌ಗಳು ಸಸ್ಯ-ಆಧಾರಿತ ಆಹಾರಗಳಲ್ಲಿ ನೈಸರ್ಗಿಕವಾಗಿ ಕಂಡುಬರುವ ರಾಸಾಯನಿಕ ಸಂಯುಕ್ತಗಳಾಗಿವೆ. ಉದಾಹರಣೆಗೆ, ಫ್ಲೇವನಾಯ್ಡ್‌ಗಳು, ಕ್ಯಾರೊಟಿನಾಯ್ಡ್‌ಗಳು ಮತ್ತು ಗ್ಲುಕೋಸಿನೊಲೇಟ್‌ಗಳು) ಇದು ದೀರ್ಘಕಾಲದ ಕಾಯಿಲೆಯ ತಡೆಗಟ್ಟುವಿಕೆಗೆ ನಿರ್ಣಾಯಕವಾಗಿದೆ.
ಮಣ್ಣಿನ ಆರೋಗ್ಯವನ್ನು ಬೆಂಬಲಿಸುವಾಗ ಫೈಟೊನ್ಯೂಟ್ರಿಯಂಟ್‌ಗಳ ಪ್ರಯೋಜನಗಳನ್ನು ಪಡೆದುಕೊಳ್ಳಲು, ಸುಸ್ಥಿರ ಕೃಷಿ ಪದ್ಧತಿಗಳು ಮತ್ತು ಮಣ್ಣಿನ ಸಂರಕ್ಷಣೆಗೆ ಆದ್ಯತೆ ನೀಡುವ ಸ್ಥಳೀಯ ಬೆಳೆಗಾರರಿಂದ ಕಾಲೋಚಿತ ಉತ್ಪನ್ನಗಳ ಖರೀದಿ ಅಗತ್ಯ.
