ಬರ ನಿರ್ವಹಣೆಗೆ ಹೊಸ ತಂತ್ರಜ್ಞಾನಗಳ ಅನಾವರಣ

• 75 ಬೆಳೆಗಳ ಪ್ರಾತ್ಯಕ್ಷಿಕೆ, 100 ತಂತ್ರಜ್ಞಾನ ಮಳಿಗೆಗಳು; ನವೆಂಬರ್ 16ರಿಂದ ಮೂರು ದಿನಗಳ ಕಾಲ ಬೆಂಗಳೂರು ಕೃಷಿಮೇಳ-2026

ಬೆಂಗಳೂರು: ಹವಾಮಾನ ವೈಪರೀತ್ಯ, ಅನಿಶ್ಚಿತ ಮುಂಗಾರು, ಹೆಚ್ಚುತ್ತಿರುವ ತಾಪಮಾನ, ಅಂತರ್ಜಲ ಕುಸಿತ ಹಾಗೂ ಕೃಷಿ ಉತ್ಪಾದನಾ ವೆಚ್ಚದ ಏರಿಕೆ ಇಂದಿನ ರೈತರನ್ನು ಕಾಡುತ್ತಿರುವ ಪ್ರಮುಖ ಸವಾಲುಗಳು. ಇಂತಹ ಸಂದರ್ಭದಲ್ಲಿ ಕಡಿಮೆ ನೀರಿನಲ್ಲಿ ಹೆಚ್ಚು ಇಳುವರಿ ಪಡೆಯುವುದು, ಬರ ಪರಿಸ್ಥಿತಿಗೆ ಹೊಂದಿಕೊಳ್ಳುವ ಬೆಳೆಗಳನ್ನು ಆಯ್ಕೆ ಮಾಡುವುದು ಮತ್ತು ಆಧುನಿಕ ಕೃಷಿ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವುದು ಅನಿವಾರ್ಯವಾಗುತ್ತಿದೆ.

ಈ ಹಿನ್ನೆಲೆಯಲ್ಲಿ ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯವು ರೈತರಿಗೆ ಬರ ನಿರ್ವಹಣಾ ತಂತ್ರಜ್ಞಾನಗಳು ಹಾಗೂ ಕೃಷಿ ನಾವೀನ್ಯತೆಗಳನ್ನು ಪರಿಚಯಿಸುವ ಉದ್ದೇಶದಿಂದ ನವೆಂಬರ್ 16, 17 ಮತ್ತು 18ರಂದು ಮೂರು ದಿನಗಳ ಕಾಲ ಕೃಷಿಮೇಳ-2026 ಆಯೋಜಿಸಿದೆ.

ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯದ ಆವರಣದಲ್ಲಿ ನಡೆಯಲಿರುವ ಈ ಬಾರಿಯ ಕೃಷಿಮೇಳವು ಬರ ನಿರ್ವಹಣೆ, ಹವಾಮಾನ ಬದಲಾವಣೆಗೆ ಹೊಂದಿಕೊಳ್ಳುವ ಕೃಷಿ ಪದ್ಧತಿಗಳು, ಮಣ್ಣು ಮತ್ತು ನೀರಿನ ಸಂರಕ್ಷಣೆ ಹಾಗೂ ತಂತ್ರಜ್ಞಾನ ಆಧಾರಿತ ಕೃಷಿಗೆ ಹೆಚ್ಚಿನ ಆದ್ಯತೆ ನೀಡಿದೆ.

10 ಎಕರೆ ಪ್ರದೇಶದಲ್ಲಿ 75 ಬೆಳೆಗಳ ಪ್ರಾತ್ಯಕ್ಷಿಕೆ

ಈ ಬಾರಿಯ ಕೃಷಿಮೇಳದ ಪ್ರಮುಖ ಆಕರ್ಷಣೆಗಳಲ್ಲಿ ಸುಮಾರು 10 ಎಕರೆ ಪ್ರದೇಶದಲ್ಲಿ ರೂಪಿಸಿರುವ ಬೆಳೆ ಪ್ರಾತ್ಯಕ್ಷಿಕೆ ಪ್ರಮುಖವಾದುದು. ಒಂದೇ ಪ್ರದೇಶದಲ್ಲಿ ಸುಮಾರು 75 ವೈವಿಧ್ಯಮಯ ಬೆಳೆಗಳು ಮತ್ತು ಅವುಗಳ ತಳಿಗಳನ್ನು ವೈಜ್ಞಾನಿಕವಾಗಿ ಬೆಳೆದು ಪ್ರದರ್ಶಿಸಲಾಗುತ್ತದೆ.

ಇದರಿಂದ ರೈತರು ವಿವಿಧ ಬೆಳೆಗಳ ಬೆಳವಣಿಗೆ, ಕೃಷಿ ಗುಣಲಕ್ಷಣಗಳು ಹಾಗೂ ಬರ ಪರಿಸ್ಥಿತಿಗೆ ಅವುಗಳ ಹೊಂದಾಣಿಕೆಯನ್ನು ನೇರವಾಗಿ ವೀಕ್ಷಿಸಲು ಅವಕಾಶ ದೊರೆಯಲಿದೆ. ವಿಶೇಷವಾಗಿ ಮಳೆಯಾಶ್ರಿತ ಕೃಷಿ ಪ್ರದೇಶಗಳ ರೈತರು ತಮ್ಮ ಜಮೀನಿನ ಮಣ್ಣಿನ ಗುಣಲಕ್ಷಣ, ನೀರಿನ ಲಭ್ಯತೆ ಮತ್ತು ಹವಾಮಾನ ಪರಿಸ್ಥಿತಿಗೆ ಸೂಕ್ತವಾದ ಬೆಳೆ ಹಾಗೂ ತಳಿಗಳನ್ನು ಗುರುತಿಸಿಕೊಳ್ಳಲು ಈ ಪ್ರಾತ್ಯಕ್ಷಿಕೆ ಸಹಕಾರಿಯಾಗಬಹುದು.

ಬರ ನಿರ್ವಹಣೆಗೆ ಆದ್ಯತೆ

ಮಳೆಯ ಪ್ರಮಾಣದಲ್ಲಿ ಏರುಪೇರು ಉಂಟಾದಾಗ ಬೆಳೆ ನಷ್ಟವನ್ನು ಕಡಿಮೆ ಮಾಡುವುದು ಹೇಗೆ? ಮಳೆ ವಿಳಂಬವಾದರೆ ಯಾವ ಬೆಳೆಗಳನ್ನು ಆಯ್ಕೆ ಮಾಡಬೇಕು? ಬೆಳೆಗಳ ನಿರ್ಣಾಯಕ ಬೆಳವಣಿಗೆಯ ಹಂತದಲ್ಲಿ ನೀರಿನ ಕೊರತೆಯಾದರೆ ಯಾವ ಕ್ರಮ ಕೈಗೊಳ್ಳಬೇಕು? ಇಂತಹ ರೈತರ ಪ್ರಮುಖ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳಲು ಬರ ನಿರ್ವಹಣಾ ತಂತ್ರಜ್ಞಾನಗಳನ್ನು ಪ್ರದರ್ಶಿಸಲಾಗುತ್ತದೆ.

ಬರ ಪರಿಸ್ಥಿತಿಗೆ ಸೂಕ್ತವಾದ ಬೆಳೆಗಳು ಮತ್ತು ತಳಿಗಳು, ನೀರಿನ ಮಿತಬಳಕೆ, ಮಣ್ಣಿನ ತೇವಾಂಶ ಸಂರಕ್ಷಣೆ ಹಾಗೂ ವೈಜ್ಞಾನಿಕ ಬೆಳೆ ನಿರ್ವಹಣಾ ವಿಧಾನಗಳ ಕುರಿತು ರೈತರು ಮಾಹಿತಿ ಪಡೆಯಬಹುದು. ಬರಗಾಲದ ಸಂದರ್ಭದಲ್ಲಿ ಸಂಪೂರ್ಣ ಬೆಳೆ ನಷ್ಟವಾಗುವುದನ್ನು ತಪ್ಪಿಸಲು ಬೆಳೆ ವೈವಿಧ್ಯೀಕರಣ, ಅಲ್ಪಾವಧಿ ತಳಿಗಳ ಆಯ್ಕೆ, ಅಂತರ ಬೆಳೆ ಪದ್ಧತಿ ಹಾಗೂ ಮಣ್ಣಿನ ತೇವಾಂಶ ಕಾಪಾಡುವ ತಂತ್ರಗಳ ಮಹತ್ವವನ್ನೂ ರೈತರು ಅರಿಯಲು ಇದು ಉತ್ತಮ ವೇದಿಕೆಯಾಗಲಿದೆ.

100 ತಂತ್ರಜ್ಞಾನ ಮಳಿಗೆಗಳು

ಈ ಬಾರಿಯ ಕೃಷಿಮೇಳವನ್ನು ತಂತ್ರಜ್ಞಾನ ಆಧಾರಿತವಾಗಿ ರೂಪಿಸಲಾಗಿದ್ದು, ಸುಮಾರು 100 ತಂತ್ರಜ್ಞಾನ ಮಳಿಗೆಗಳನ್ನು ತೆರೆಯಲಾಗುತ್ತದೆ. ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯದ ವಿವಿಧ ಸಂಶೋಧನಾ ವಿಭಾಗಗಳು, ರಾಜ್ಯದ ಇತರ ಕೃಷಿ ವಿಶ್ವವಿದ್ಯಾನಿಲಯಗಳು, ರಾಷ್ಟ್ರೀಯ ಸಂಶೋಧನಾ ಸಂಸ್ಥೆಗಳು ಹಾಗೂ ಕೃಷಿ ಅಭಿವೃದ್ಧಿ ಇಲಾಖೆಗಳು ಭಾಗವಹಿಸಲಿವೆ. ತಮ್ಮ ಸಂಶೋಧನೆಗಳು, ಹೊಸ ಕೃಷಿ ತಂತ್ರಜ್ಞಾನಗಳು, ರೈತರಿಗೆ ಅನುಕೂಲವಾಗುವ ಯೋಜನೆಗಳು ಮತ್ತು ಕೃಷಿ ಉತ್ಪಾದಕತೆಯನ್ನು ಹೆಚ್ಚಿಸುವ ನಾವೀನ್ಯತೆಗಳನ್ನು ಈ ಸಂಸ್ಥೆಗಳು ಪ್ರದರ್ಶಿಸಲಿವೆ. ಬೀಜೋತ್ಪಾದನೆ, ಬೆಳೆ ಸಂರಕ್ಷಣೆ, ಮಣ್ಣಿನ ಆರೋಗ್ಯ, ನೀರಿನ ನಿರ್ವಹಣೆ, ಕೃಷಿ ಯಾಂತ್ರೀಕರಣ ಹಾಗೂ ಸುಧಾರಿತ ಕೃಷಿ ಪದ್ಧತಿಗಳಿಗೆ ಸಂಬಂಧಿಸಿದ ಮಾಹಿತಿ ಪಡೆಯಲು ರೈತರಿಗೆ ಅವಕಾಶ ದೊರೆಯಲಿದೆ.

ಕೀಟ ವಿಸ್ಮಯದಿಂದ ಮಧುವನವರೆಗೆ!

ಕೃಷಿಮೇಳದಲ್ಲಿ ರೈತರ ಗಮನ ಸೆಳೆಯುವ ಮತ್ತೊಂದು ವಿಶೇಷ ಆಕರ್ಷಣೆ ಕೀಟ ವಿಸ್ಮಯ. ಕೃಷಿ ಪರಿಸರದಲ್ಲಿ ಕೀಟಗಳ ಪಾತ್ರ, ಉಪಕಾರಿ ಮತ್ತು ಹಾನಿಕಾರಕ ಕೀಟಗಳ ನಡುವಿನ ವ್ಯತ್ಯಾಸ ಹಾಗೂ ಬೆಳೆ ಸಂರಕ್ಷಣೆಯಲ್ಲಿ ಅವುಗಳ ಮಹತ್ವವನ್ನು ತಿಳಿದುಕೊಳ್ಳಲು ಇದು ನೆರವಾಗಲಿದೆ. ಇದರೊಂದಿಗೆ ಮಧುವನ, ಒಣಭೂಮಿ ಕೃಷಿ ಪ್ರಾತ್ಯಕ್ಷಿಕೆ ಮತ್ತು ಸಮಗ್ರ ಇಳುವರಿ ಪ್ರಾತ್ಯಕ್ಷಿಕೆಗಳನ್ನು ಆಯೋಜಿಸಲಾಗಿದೆ.

ಮಧುವನದ ಮೂಲಕ ಜೇನುನೊಣಗಳ ಸಾಕಣೆ, ಪರಾಗಸ್ಪರ್ಶ ಮತ್ತು ಜೇನು ಕೃಷಿಯ ಮಹತ್ವವನ್ನು ಅರಿಯಬಹುದು. ಜೇನುನೊಣಗಳು ಮತ್ತು ಇತರ ಪರಾಗಸ್ಪರ್ಶಕ ಜೀವಿಗಳ ಸಂರಕ್ಷಣೆ ಕೃಷಿ ಉತ್ಪಾದನೆಯಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ.

ಒಣಭೂಮಿ ಕೃಷಿ ಪ್ರಾತ್ಯಕ್ಷಿಕೆ ಮಳೆಯಾಶ್ರಿತ ಪ್ರದೇಶಗಳ ರೈತರಿಗೆ ಉಪಯುಕ್ತವಾಗಬಹುದು. ಕಡಿಮೆ ಮಳೆಯಲ್ಲಿಯೂ ಕೃಷಿ ಉತ್ಪಾದನೆಯನ್ನು ಉಳಿಸಿಕೊಳ್ಳುವ ವಿಧಾನಗಳು, ಮಣ್ಣಿನ ತೇವಾಂಶ ಸಂರಕ್ಷಣೆ ಮತ್ತು ಬೆಳೆ ಆಯ್ಕೆಯ ಕುರಿತು ಪ್ರಾಯೋಗಿಕ ಮಾಹಿತಿ ಪಡೆಯಬಹುದು.

ಎಲ್ ನಿನೋ, ಹವಾಮಾನ ವೈಪರೀತ್ಯದ ಕುರಿತು ವಿಚಾರ ಸಂಕಿರಣ

ಹವಾಮಾನ ಬದಲಾವಣೆಯ ಪರಿಣಾಮಗಳು ಕೃಷಿಯ ಮೇಲೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ಬಾರಿಯ ಕೃಷಿಮೇಳದಲ್ಲಿ ತಜ್ಞರಿಂದ ವಿಶೇಷ ವಿಚಾರ ಸಂಕಿರಣಗಳನ್ನು ಆಯೋಜಿಸಲಾಗಿದೆ. ರಾಜ್ಯದಲ್ಲಿ ಕಂಡುಬಂದಿರುವ ಎಲ್ ನಿನೋ ಪರಿಣಾಮಗಳು ಮತ್ತು ಭವಿಷ್ಯದ ಕೃಷಿ ಸಿದ್ಧತೆಗಳು, ಹವಾಮಾನ ವೈಪರೀತ್ಯಕ್ಕೆ ಹೊಂದಿಕೊಳ್ಳುವ ಚತುರ ಕೃಷಿ ಪದ್ಧತಿಗಳು ಹಾಗೂ ಮಣ್ಣು ಮತ್ತು ನೀರಿನ ಸಂರಕ್ಷಣೆಯ ಕುರಿತು ತಜ್ಞರು ಮಾಹಿತಿ ನೀಡಲಿದ್ದಾರೆ.

ಮುಂದಿನ ದಿನಗಳಲ್ಲಿ ಮುಂಗಾರು ಮಳೆಯ ಅನಿಶ್ಚಿತತೆ, ತಾಪಮಾನ ಏರಿಕೆ ಮತ್ತು ಮಳೆಯ ಹಂಚಿಕೆಯಲ್ಲಿನ ಬದಲಾವಣೆಗಳನ್ನು ಗಮನದಲ್ಲಿಟ್ಟುಕೊಂಡು ಕೃಷಿ ಯೋಜನೆ ರೂಪಿಸುವುದು ಹೇಗೆ ಎಂಬುದರ ಕುರಿತು ರೈತರು ತಜ್ಞರೊಂದಿಗೆ ಚರ್ಚಿಸಬಹುದು.

ವಿಶೇಷವಾಗಿ ಮಳೆ ಆಧಾರಿತ ಕೃಷಿ ಮಾಡುವ ರೈತರು ಹವಾಮಾನ ಮುನ್ಸೂಚನೆಗಳನ್ನು ಆಧರಿಸಿ ಬಿತ್ತನೆ, ಬೆಳೆ ಆಯ್ಕೆ ಮತ್ತು ನೀರಿನ ನಿರ್ವಹಣೆ ಮಾಡುವುದರ ಮಹತ್ವವನ್ನು ಅರಿತುಕೊಳ್ಳಲು ಈ ವಿಚಾರ ಸಂಕಿರಣಗಳು ಸಹಕಾರಿಯಾಗಲಿವೆ.

ರೈತರ ಸಮಸ್ಯೆಗಳಿಗೆ ಸ್ಥಳದಲ್ಲೇ ಪರಿಹಾರ

ಕೃಷಿಮೇಳಕ್ಕೆ ಭೇಟಿ ನೀಡುವ ರೈತರ ವೈಯಕ್ತಿಕ ಕೃಷಿ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ತಜ್ಞರ ಸಲಹಾ ಕೇಂದ್ರ ತೆರೆಯಲಾಗುತ್ತಿದೆ. ಬೆಳೆಗಳಲ್ಲಿ ಕಾಣಿಸಿಕೊಳ್ಳುವ ರೋಗ ಮತ್ತು ಕೀಟಬಾಧೆ, ಮಣ್ಣಿನ ಫಲವತ್ತತೆ, ಪೋಷಕಾಂಶಗಳ ಕೊರತೆ, ನೀರಾವರಿ ನಿರ್ವಹಣೆ, ಬೆಳೆ ಆಯ್ಕೆ ಹಾಗೂ ಇತರ ಕೃಷಿ ಸಮಸ್ಯೆಗಳ ಕುರಿತು ತಜ್ಞರೊಂದಿಗೆ ಚರ್ಚಿಸಿ ಮಾರ್ಗದರ್ಶನ ಪಡೆಯಲು ರೈತರು ಈ ಅವಕಾಶ ಬಳಸಿಕೊಳ್ಳಬಹುದು.

ರೈತರು ತಮ್ಮ ಜಮೀನಿನ ಮಣ್ಣಿನ ಪರೀಕ್ಷಾ ವರದಿ, ಬೆಳೆಗಳ ಸಮಸ್ಯೆಗಳ ಛಾಯಾಚಿತ್ರಗಳು ಹಾಗೂ ಲಭ್ಯವಿರುವ ಇತರ ಮಾಹಿತಿಗಳನ್ನು ತೆಗೆದುಕೊಂಡು ಹೋದರೆ ತಜ್ಞರಿಂದ ಸೂಕ್ತ ಸಲಹೆ ಪಡೆಯಲು ಅನುಕೂಲವಾಗಬಹುದು.

ಪ್ರಗತಿಪರ ರೈತರಿಗೆ ಪ್ರಶಸ್ತಿ ಗೌರವ

ಕೃಷಿಯಲ್ಲಿ ಸಾಧನೆ ಮಾಡಿರುವ ರೈತರನ್ನು ಗುರುತಿಸಿ ಪ್ರೋತ್ಸಾಹಿಸುವ ಉದ್ದೇಶದಿಂದ ರಾಜ್ಯ, ಜಿಲ್ಲೆ ಮತ್ತು ತಾಲ್ಲೂಕು ಮಟ್ಟದ ಪ್ರಗತಿಪರ ರೈತ ಹಾಗೂ ರೈತ ಮಹಿಳಾ ಪ್ರಶಸ್ತಿಗಳನ್ನು ಕೃಷಿಮೇಳದ ಅಂಗವಾಗಿ ಪ್ರದಾನ ಮಾಡಲಾಗುತ್ತದೆ. ಕೃಷಿಯಲ್ಲಿ ಹೊಸ ಪ್ರಯೋಗಗಳನ್ನು ಕೈಗೊಂಡವರು, ಸುಸ್ಥಿರ ಕೃಷಿ ಪದ್ಧತಿಗಳನ್ನು ಅಳವಡಿಸಿಕೊಂಡವರು ಹಾಗೂ ಇತರ ರೈತರಿಗೆ ಮಾದರಿಯಾಗಿರುವ ಸಾಧಕರನ್ನು ಗೌರವಿಸುವುದು ಈ ಕಾರ್ಯಕ್ರಮದ ಉದ್ದೇಶವಾಗಿದೆ.

ರೈತರು ಮೇಳಕ್ಕೆ ಭೇಟಿ ನೀಡುವಾಗ ಗಮನಿಸಬೇಕಾದ 8 ಅಂಶಗಳು

1. ಕೃಷಿಮೇಳಕ್ಕೆ ಭೇಟಿ ನೀಡುವ ರೈತರು ಕೇವಲ ಮಳಿಗೆಗಳನ್ನು ವೀಕ್ಷಿಸಿ ಹಿಂತಿರುಗುವ ಬದಲು, ತಮ್ಮ ಕೃಷಿಗೆ ನೇರವಾಗಿ ಪ್ರಯೋಜನವಾಗುವ ಮಾಹಿತಿಯನ್ನು ಸಂಗ್ರಹಿಸಿಕೊಳ್ಳಬೇಕು.
2. ತಮ್ಮ ಜಮೀನಿನ ಮಣ್ಣಿನ ಗುಣಲಕ್ಷಣ ಮತ್ತು ನೀರಿನ ಲಭ್ಯತೆಗೆ ಸೂಕ್ತವಾದ ಬೆಳೆ ಹಾಗೂ ತಳಿಗಳ ಮಾಹಿತಿ ಪಡೆಯಿರಿ.
3. ಬರ ಪರಿಸ್ಥಿತಿಯನ್ನು ತಡೆದುಕೊಳ್ಳುವ ಅಲ್ಪಾವಧಿ ಮತ್ತು ಕಡಿಮೆ ನೀರು ಬೇಡುವ ತಳಿಗಳ ಕುರಿತು ತಿಳಿದುಕೊಳ್ಳಿ.
4. ಹನಿ ನೀರಾವರಿ, ತುಂತುರು ನೀರಾವರಿ ಹಾಗೂ ಮಣ್ಣಿನ ತೇವಾಂಶ ಸಂರಕ್ಷಣಾ ತಂತ್ರಗಳನ್ನು ಪರಿಶೀಲಿಸಿ.
5. ಬೆಳೆಗಳ ರೋಗ ಮತ್ತು ಕೀಟಬಾಧೆ ನಿಯಂತ್ರಣಕ್ಕೆ ಸಮಗ್ರ ಕೀಟ ನಿರ್ವಹಣಾ ವಿಧಾನಗಳನ್ನು ತಿಳಿದುಕೊಳ್ಳಿ.
6. ಮಣ್ಣು ಪರೀಕ್ಷೆ ಆಧರಿಸಿ ಸಮತೋಲಿತ ಗೊಬ್ಬರ ಬಳಕೆಯ ಕುರಿತು ತಜ್ಞರ ಸಲಹೆ ಪಡೆಯಿರಿ.
7. ಕೃಷಿ ಯಂತ್ರೋಪಕರಣಗಳು ಮತ್ತು ಹೊಸ ತಂತ್ರಜ್ಞಾನಗಳ ವೆಚ್ಚ, ಬಳಕೆ ಹಾಗೂ ನಿರ್ವಹಣೆಯ ಬಗ್ಗೆ ಮಾಹಿತಿ ಸಂಗ್ರಹಿಸಿ.
8. ಕೃಷಿ ಇಲಾಖೆಯ ವಿವಿಧ ಯೋಜನೆಗಳು ಮತ್ತು ಲಭ್ಯವಿರುವ ಸಬ್ಸಿಡಿಗಳ ಅರ್ಹತೆ ಹಾಗೂ ಅರ್ಜಿ ವಿಧಾನ ತಿಳಿದುಕೊಳ್ಳಿ.
9. ನಿಮ್ಮ ಜಮೀನಿನಲ್ಲಿ ಅಳವಡಿಸಿಕೊಳ್ಳಲು ಉದ್ದೇಶಿಸಿರುವ ತಂತ್ರಜ್ಞಾನವನ್ನು ಮೊದಲು ಸಣ್ಣ ಪ್ರದೇಶದಲ್ಲಿ ಪ್ರಯೋಗಿಸಿ, ಫಲಿತಾಂಶ ಪರಿಶೀಲಿಸಿ ವಿಸ್ತರಿಸಿ.

ಕೃಷಿಯ ಭವಿಷ್ಯಕ್ಕೆ ಹೊಸ ದಾರಿ

ಇಂದಿನ ಕೃಷಿಗೆ ಕೇವಲ ಉತ್ತಮ ಬೀಜ ಮತ್ತು ಗೊಬ್ಬರಗಳಿದ್ದರೆ ಸಾಲದು. ಹವಾಮಾನಕ್ಕೆ ಹೊಂದಿಕೊಳ್ಳುವ ಬೆಳೆ ಆಯ್ಕೆ, ವೈಜ್ಞಾನಿಕ ನೀರಿನ ಬಳಕೆ, ಮಣ್ಣಿನ ಆರೋಗ್ಯ ಸಂರಕ್ಷಣೆ, ತಂತ್ರಜ್ಞಾನದ ಅಳವಡಿಕೆ ಮತ್ತು ಮಾರುಕಟ್ಟೆ ಅರಿವು ಕೂಡ ಅಷ್ಟೇ ಮುಖ್ಯ.

ಈ ನಿಟ್ಟಿನಲ್ಲಿ ಕೃಷಿಮೇಳಗಳು ರೈತರು, ವಿಜ್ಞಾನಿಗಳು, ಸಂಶೋಧಕರು ಮತ್ತು ಕೃಷಿ ಉದ್ಯಮಿಗಳ ನಡುವೆ ಜ್ಞಾನ ವಿನಿಮಯಕ್ಕೆ ಮಹತ್ವದ ವೇದಿಕೆಯಾಗುತ್ತವೆ. ಕೃಷಿಯಲ್ಲಿ ಹೊಸ ಪ್ರಯೋಗಗಳನ್ನು ಮಾಡಲು ಬಯಸುವ ಯುವ ರೈತರು, ಮಳೆಯಾಶ್ರಿತ ಕೃಷಿಕರು, ಮಹಿಳಾ ಕೃಷಿಕರು ಹಾಗೂ ಕೃಷಿ ವಿದ್ಯಾರ್ಥಿಗಳು ಈ ಅವಕಾಶವನ್ನು ಸದುಪಯೋಗಪಡಿಸಿಕೊಳ್ಳಬೇಕು.

ದಿನಾಂಕ: ನವೆಂಬರ್ 16, 17 ಮತ್ತು 18, 2026

ಸ್ಥಳ: ಕೃಷಿ ವಿಶ್ವವಿದ್ಯಾನಿಲಯದ ಆವರಣ, ಬೆಂಗಳೂರು

ಬರ ನಿರ್ವಹಣೆಯಿಂದ ಹಿಡಿದು ಆಧುನಿಕ ಕೃಷಿ ನಾವೀನ್ಯತೆಗಳವರೆಗೆ ಒಂದೇ ಸೂರಿನಡಿ ಮಾಹಿತಿ ಮತ್ತು ಪ್ರಾತ್ಯಕ್ಷಿಕೆಗಳನ್ನು ಒದಗಿಸುವ ಈ ಕೃಷಿಮೇಳದಲ್ಲಿ ರೈತರು, ರೈತ ಮಹಿಳೆಯರು, ಕೃಷಿ ಆಸಕ್ತರು, ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ ಪ್ರಯೋಜನ ಪಡೆಯಬೇಕೆಂದು ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯ ಮನವಿ ಮಾಡಿದೆ.